Молитвы о живых
Помяни́, Го́споди Иисусе Христе́, Бо́же наш, ми́лости и щедро́ты Твоя́ от ве́ка су́щия, их же ради и вочелове́чился еси́, и распя́тие и сме́рть, спасе́ния в пра́во в Тя ве́рующих, претерпе́ти изво́лил еси́ и воскре́с из ме́ртвых, возне́слся еси́ на небеса́ и седи́ши одесну́ю Бо́га Отца́, и призира́еши на смире́нныя мольбы́ всем се́рдцем призывающих Тя: приклони́ у́хо Твое́, и услы́ши смире́нное моле́ние мене́ непотре́бнаго раба́ Твоего́, в воню́ благоуха́ния духо́вного, Тебе́ за вся люди Твоя́ приносяща́го. И в пе́рвых помяни́ Це́рковь Твою Святу́ю, Собо́рную и Апо́стольскую, ю́же снабде́л еси́ честно́ю Твое́ю Кро́вию, и утверди́, и укрепи́, и разши́ри, умно́жи, умири́, и неопреобори́му а́довыми враты́ во ве́ки сохрани́, раздира́ния церкве́й утиши́, шата́ния язы́ческая угаси́, и ересе́й воста́ния ско́ро разори́ и искорени́ и в ничто́же си́лою Свята́го Твоего́ Ду́ха обрати́. (Поклон)
Спаси́ Го́споди, и поми́луй Бо́гом храни́мую страну́ на́шу, вла́сти и во́инства ея́, огради́ миром держа́ву их, и покори́ под но́ги их вся́кого врага́ и супоста́та, и глаго́ли ми́рная и блага́я в сердца́х их о Це́ркви Твое́й Святе́й, и о всех лю́дех Твои́х: да ти́хое и безмо́лное житие́ поживе́м во правове́рии, и во вся́ком благоче́стии и чистоте́. (Поклон)
Спаси́ Го́споди, и поми́луй вели́кого господи́на и отца́ на́шего святе́йшего патриа́рха (имя), преосвяще́нныя митрополи́ты,архиепи́скопы и епи́скопы правосла́вныя, иере́и же и диа́коны, и весь при́чет церко́вный, я́же поста́вил еси́ пасти́ слове́сное Твое́ ста́до, и моли́твами их поми́луй и спаси́ мя гре́шнаго. (Поклон)
Спаси́ Го́споди, и поми́луй отца́ моего́ духо́вного, и святы́ми его́ моли́твами прости́ моя́ согреше́ния. (Поклон)
Спаси́ Го́споди, и поми́луй роди́тели моя́(имена их), бра́тию и сестры́, и сро́дники моя́ по пло́ти, и вся́ бли́жняя ро́да моего́, и дру́ги, и да́руй им ми́рная Твоя́ и преми́рная блага́я. (Поклон)
Спаси́ Го́споди, и поми́луй по мно́жеству щедро́т Твои́х вся священнои́ноки, и́ноки же и и́нокини, и вся в де́встве же и благогове́нии и по́стничестве живу́щыя в монастыре́х, в пусты́нях, в пеще́рах, гора́х, столпе́х, затво́рех, разсе́линах ка́менных, острове́х же морски́х, и на вся́ком ме́сте влады́чествия Твоего́ правове́рно живу́щыя, и благоче́стно служа́щыя Ти, и моля́щыяся Тебе́: облегчи́ им тя́готу, и уте́ши их скорбь, и к по́двигу о Тебе́ си́лу и кре́пость им пода́ждь, и моли́твами их да́руй ми оставле́ние грехо́в. (Поклон)
Спаси́ Го́споди, и поми́луй ста́рцы и ю́ныя, ни́щия и сироты́ и вдови́цы, и су́щия в боле́зни и в печа́лех, беда́х же и ско́рбех, обстоя́ниях и плене́ниях, темни́цах же и заточе́ниях, изря́днее же в гоне́ниях, Тебе́ ра́ди и ве́ры правосла́вныя, от язык безбо́жных от еретико́в, су́щия рабы́ Твоя́, и помяни́ я, посети́, укрепи́, уте́ши, и вско́ре си́лою Твое́ю осла́бу, свобо́ду и изба́ву им пода́ждь. (Поклон)
Спаси́ Го́споди, и поми́луй благотворя́щыя нам, ми́лующыя и пита́ющыя нас, да́вшыя нам ми́лостыни, и запове́давшыя нам недосто́йным моли́тися о них, и упокоева́ющыя нас, и сотвори ми́лость Твою́ с ни́ми, да́руя им вся, я́же ко спасе́нию и ве́чных благ восприя́тие. (Поклон)
Спаси́ Го́споди, и поми́луй по́сланныя в службу, путеше́ствущия, отцы́ и бра́тию на́шу и сестры́, и вся правосла́вныя христиа́ны. (Поклон)
Спаси́ Го́споди, и поми́луй и́хже аз безу́мием мои́м соблазни́х, и от пути́ спаси́тельного отврати́х, к дело́м злым и неподо́бным приведо́х; боже́ственным Твои́м про́мыслом к пути́ спасе́ния па́ки возврати́. (Поклон)
Спаси́ Го́споди, и поми́луй ненави́дящия и оби́дящия мя, и творя́щия ми напа́сти, и не оста́ви их поги́бнути мене́ ра́ди гре́шнаго. (Поклон)
Отступи́вшия от правосла́вныя ве́ры и поги́бельными ересьми́ ослепле́нныя, све́том Твоего́ позна́ния просвети́ и Святе́й Твое́й Апо́стольстей Собо́рней Це́ркви причти́. (Поклон)
Молитвы о усопших
Помяни́, Го́споди, от жития́ отше́дшыя правове́рныя цари́ и цари́цы, благове́рныя кня́зи и княги́ни, святе́йшыя патриа́рхи, преосвяще́нныя митрополи́ты, архиепи́скопы и епи́скопы правосла́вныя, во иере́стем же и в при́чте церко́внем, и и́ноческом чи́не Тебе́ послужи́вшыя, и в ве́чных Твои́х селения́х со святы́ми упоко́й (Поклон)
Помяни́, Го́споди, ду́ши усо́пших рабо́в Твои́х, роди́телей мои́х (имена их), и всех сро́дников по пло́ти; и прости́ их вся согреше́ния во́льная и нево́льная, да́руя им Ца́рствие и прича́стие ве́чных Твои́х благи́х и Твоея́ безконе́чныя и блаже́нныя жи́зни наслажде́ния. (Поклон)
Помяни́, Го́споди, и вся в наде́жди воскресе́ния и жи́зни ве́чныя усо́пшия, отцы́ и бра́тию на́шу, и сестры́, и зде лежа́щия и повсю́ду, правосла́вныя христиа́ны, и со святы́ми Твои́ми, иде́же присеща́ет свет лица́ Твоего́, всели́, и нас поми́луй, я́ко Благ и Человеколю́бец, Ами́нь. (Поклон)
Пода́ждь, Го́споди, оставле́ние грехо́в всем пре́жде отше́дшим в ве́ре и наде́жде воскресе́ния, отцем, бра́тиям и сестра́м на́шими сотвори́ им ве́чную па́мять.
(Трижды)
