Молитвы за ближних ко Пресвятой Богородице

О Пресвятая Госпоже Владычице Дево Богородице! Воздвигни нас, раб Божиих (имена) из глубины греховныя и избави нас от внезапныя смерти и от всякаго зла. Подаждь Госпоже, нам мир и здравие и просвети нам ум и очи сердечныя, еже ко спасению, и сподоби ны, грешныя рабы Твоя, Царствия Сына Твоего, Христа Бога нашего: яко держава Его благословенна со Отцем и Пресвятым Духом . Аминь.

Пресвятая Дево, Мати Господа, покажи на мне, убозем, и рабах Божиих (имена) древния милости Твоя: низпосли дух разума и благочестия, дух милосердия и кротости, дух чистоты и правды. Ей Госпоже Пречистая! Милостива мне буди зде и на Страшном Суде. Ты бо еси, Госпоже, слава небесных и упование земных. Аминь.

О Пресвятая Госпоже Владычице Дево Богородице! Призри с высоты святыя Твоея на нас, раб Божиих (имена), и помози нам немощным, утоли скорби наша, настави на путь правый; уврачуй болезненная сердца наша, даруй прочее время жития нашего в мире и покаянии проводити; подаждь христианскую кончину и на Страшнем Суде Сына Твоего явися нам милосердная предстательница, да всегда славим Тя со всеми угодившими Богу во веки веков. Аминь.

О Царице Богородице, Христа Бога нашего Мати! Услыши ны и избави нас, раб Божиих (имена), от всякия скорби и печали, огради от всякия напасти и злых клевет и от направедного и лютаго навета вражия. Можеши бо, о благодатная Мати Божия, не точию от всякаго зла сохранити люди Твоя, но и всяким благодеянием снабдити их и спасти: разве Тебе, иныя Ходатаицы о нас грешных не имамы к Сыну Твоему, Егоже умоли, Владычице, да спасеннии Тобою, славим Сына Твоего и Бога нашего, купно со Отцем и Святым Духом, ныне и в бесконечныя веки. Аминь

О милостивая и премилостивая Госпоже Царице Богородице! Ты, яже восхощеши, вся испросити от Сына Твоего Христа Бога нашего можеши: не отрини убо нас, раб Божиих (имена), от Твоего заступления, подаждь освобождение от бед и скорбей наших и избави нас раб Божиих (имена) Всенепорочная, от видимых и невидимых враг и от злых человек, клевещущих на ны, и моли Сына Твоего и Бога нашего, яко да в день Суда одесную поставит ны ради Твоего предстательства. Тому слава и держава, со безначальным Его Отцем и Святым Духом, ныне и присно, и во веки веков. Аминь.

Богорадованная Владычице, Всемилостивая о всем мире Ходатаице! Прилежно раби Твои ко Твоему предстательству прибегаем: молитву теплуюСыну Твоему и Богу нашему сотвори о рабех Божиих (имена), да от всяких болезней и печалей нас, Тебе ради, избавит, и от грехов свободив, Царствия Своего Небесного наследники ны покажет; велие бо и неизреченное, яко Мати, к Нему дерзновение имаши и вся от Него испросити можеши, Едина во веки Преблагословенная.